မောင်တောမြို့နယ်၌ ဆွဲမိုင်းတစ်လုံးပေါက်ကွဲမှုကြောင့် ၂ဦးသေ ၊ ၃ဦး ဒဏ်ရာရရှိ 

မောင်တောမြို့အဝင် ဆိုင်းဘုတ်အားတွေ့ရစဉ်( အင်တာနက်) Politics, Law & Military

ရန်ကုန်၊ မတ် ၃၁ ရက် (ဆင်ဟွာ) 

ရခိုင်ပြည်နယ် မောင်တောမြို့နယ်၌ မတ် ၃၀ရက် နံနက်ပိုင်းက ဆွဲမိုင်းတစ်လုံးပေါက်ကွဲမှုကြောင့် အမျိုးသားနှစ်ဦး သေဆုံးကာ သုံးဦး ဒဏ်ရာရရှိခဲ့ကြောင်း တပ်မတော်ကာကွယ်ရေးဦးစီးချုပ်ရုံးက ထုတ်ပြန်သော သတင်းအရ သိရသည်။ 

မောင်တောမြို့နယ်၊ ခမောင်းဆိပ်ကျေးရွာနှင့် မင်္ဂလာညွန့်ကျေးရွာနေ ဒိုင်းနက်လူမျိုး ရွာသား ၁၂ ဦးသည် ယင်းနေ့နံနက် ၈ နာရီခန့်တွင် အမဲလိုက်ရန် ခမောင်းဆိပ်ကျေးရွာမှ မော်တော်ဆိုင်ကယ်လေးစီးဖြင့် ထွက်ခွာခဲ့ရာ ခမောင်းဆိပ်-အောင်ဇူကားလမ်းဘေး၌ မော်တော်ဆိုင်ကယ်များကိုရပ်တန့်၍ လမ်းလျှောက်သွားစဉ် လှိုင်သီချောင်း တံတားနှင့် ပေ ၂၀ ခန့်အကွာသို့အရောက်၌ မိုင်းတစ်လုံးပေါက်ကွဲခဲ့သဖြင့် ရွာသားနှစ်ဦးသေဆုံးပြီး သုံးဦးမိုင်းစ ထိမှန်ဒဏ်ရာများ ရရှိခဲ့ခြင်းဖြစ်သည်။

၎င်းမိုင်းထိလူနာများသည် ခမောင်းဆိပ်ကျေးရွာရှိ နယ်မြေခံတပ်သို့ရောက်ရှိလာရာ တပ်မတော်သားများက လိုအပ် သည့် ဆေးဝါးကုသမှုများ ဆောင်ရွက်ပေးပြီး မောင်တောမြို့ရှိ ပြည်သူ့ဆေးရုံသို့ ပို့ဆောင်ဆေးကုသမှုခံယူလျက်ရှိကြောင်း သိရသည်။ မိုင်းပေါက်ကွဲမှုဖြစ်ပွားသောနေရာ တစ်ဝိုက်အား လုံခြုံရေးတပ်ဖွဲ့ဝင်များက ရှာဖွေစစ်ဆေးမှုများဆောင်ရွက်ခဲ့ရာ ပေါက်ကွဲမှုကြောင့် အကျယ် ၁၀ ပေ၊ အနက် ၈ ပေခန့်ရှိ ကျင်းတစ်ကျင်း၊ အရှည်ပေ ၅၀ ခန့်ရှိ ဝိုင်ယာ ကြိုး တစ်ချောင်း၊ တံတားအောက်မှ ကျည်ခွံ သုံးခု၊ ကျည်တစ်တောင့်နှင့် မီးလောင်ထားသော ဆိုင်ကယ် လေးစီး တို့ကို တွေ့ရှိရပြီး နယ်မြေလုံခြုံရေး လုပ်ငန်းများ ဆက်လက်ဆောင်ရွက်လျက်ရှိကြောင်း တပ်မတော်ကာကွယ်ရေးဦးစီးချုပ်ရုံးက ထုတ်ပြန်သော သတင်းအရ သိရသည်။(Xinhua)